Lehkhabu bawm - HSSLC (Arts)-a 6-nain lehkha zir chungin lehkhabu ziak ṭhin; Exam dawnah a chhungte hnenah mobile phone a pe

Higher Secondary School Leaving Certifcate (HSSLC) Exam, 2023 result tihchhuah taka Arts-a parukna, Ruth Lalrohlui d/o Dr Lalhmachhuana, Tuikual North lehkhabu ziah 'Shallow' tih chu tunhnai khan IPR minister Lalruatkima'n a tlangzarh. Ruth Lalrohlui hian exam dawnah a mobile phone a chhungte hnenah a pe daih.

Vanglaini palai zawhna chhangin, Ruth Lalrohlui chuan naupan tet aṭangin lehkha ziah a tui hle tiha sawi a, "Ka lehkhabu ziah hian ka zirlai a tibuai lo. Mahse exam dawn hnaihah chuan lehkhabu ziahna atan hun ka hmang tlem deuh a, a dawn hnaih tak takah erawh lehkha ziah ka chawlhsan ṭhin thung," a ti.

Ruth Lalrohlui hian lehkhabu pahnih - 'Shallow' leh 'The Trouble Maker' (English ve vein) a ziak tawh a, chawlhsan mai a la tum lo, 'A tam thei ang ber lehkhabu tihchhuah ka tum,' tiin a hlawk lo a nih pawhin a tuina ber a nih miau avangin lehkhabu ziah chawlhsan lam a rilruah a awm loh thu a sawi.

Social Media a khawih tam loh thu sawiin Ruth Lalrohlui chuan, 'HSSLC Exam dawn hnaihah khan ka chhungte hnenah ka mobile phone ka pe a, exam zawhah min pe let leh mai. Mahse exam zawh hnu pawh hian ka lehkhabu ziahah ka in concentrate duh avangin Facebook, Instagram leh Whatsapp-te ka delete vek. Mi phone-na atan ngawr ngawr ka hmang,' a ti.