Khiangte Construction Ṭhazual Gospel; One In Christ "Min ngaithla la"-in ngaithlatu a ngah

Mizorama kan gospel group neih ṭhat ber pawl leh active ber te zinga mi–One In Christ chuan chart thar berah hian hla pahnih rawn lanpuiin, "Min ngaithla la" tih hla chuan Ṭhazual Gospel chart chung ber a rawn luah!

Fak phu One In Christ

Tun hnai kum 5/6 liam taa hla ṭhahnem tak tichhuak a, One In Christ anga hlawhtlinna chang zui hi sawi tur an tam lo maithei. Ṭhazual Award 2022-a Best Group/Duo lawmman lo dawngtute hi an zai aṭanga thlir chuan zaithiam intelkhawm satliah an ni lo tih a hriat a, a phenah hian inpawhna thuk tak a awm tih a hriat theih a ni. Group khaidingtu leh an puipa ber, Alvin-a'n fak a phu a, chutiang bawkin member dangte inpekna sanzia hai rual a ni lo bawk.

Chart thar bera pakhatna, "Min ngaithla la" tih hi "Lalpa'n min pui a ni" album zinga mi niin, he hla hi Alvin-a chuan mawi takin Mizo ṭawngin a let a, a mawina belhchhah turin Andrew Vanchhawng chuan music lamah a lo pui bawk. Recording hi Studio A-16-ah neih a ni a, video hi BS Pictures kutchhuak a ni thung.

Seraphic Choir leh OmOmi Khiangte

Ṭhazual Chart-a pahnihnaah hian "Lalnunnem" tih hla hmanga Ṭhazual Award 2022-a Best Music Video gospel dawngtu, Seraphic Choir chuan thla hnih liam taa an hla tlangzarh "Thisen Hlu" tih chu an rawn lanpui.

Mizo Idol aṭanga Zoramin kan hmelhriat, OmOmi Khiangte chu hun rei tak rimawi lam a chawlhsan hnua a rawn let lehna hla "Ka hre reng ang" tih hmangin top 3-ah a rawn hlangkai bawk.

Chart-a hla lang dang te

Stacy VL Muanpuii hla thar "Rorelna ni" chu palinaah awmin, Praise On 2016-a pakhatna Arini Ralte leh, pahnihna Zorinsanga Sailo-te thawhdunna "Thu chauh sawi la" chuan top 5 a rawn khar.

K. Lalremmawia, Melody Lalzirliani, C. Vanlalroluahtumi (Tumtumi) leh Divine Voice-te pawh chart-ah hian an rawn lang a ni.