Manipur buaina pualin Charity Concert

Mizoram UPC kohhran ṭhalai pawl, General Pentecostal Youth Department chuan Manipur buaina avanga harsatna tawkte pualin zanin hian Charity Concert an buatsaih dawn a, Mizo mipuite chu kan Zo hnathlak unaute tana luang chhuak ve turin an sawm.

Charity Concert hi Mizoram UPC General Headquarters Conference Hall, Zonuamah zanin dar 8:00 hian neih a ni dawn a, General PYD YouTube channel-ah live-a pekchhuah tur niin, Mizo mipuite chu gpay/online (8119966997/8730922316) kaltlanga sum thawh ve turin an sawm a ni.

GPYD president Upa R. Vanlalruata chuan, "GPYD chuan a theih chin chinah Manipur buaina avanga harsatna tawkte pualin hma a lo la tawh a, chi leh chi inkara buaina avanga harsatna thleng avanga chak taka hma la turin Manipur leh India sorkar ngenna thuchhuah pawh lo siam tawhin, India Prime Minister hnenah pawh lehkha kan thawn tawh a ni.

"Kristiante Biak in zah pah lo taka suasam a ni te, kan Pastor-te chenna thlenga zah loa kutthlak a ni te, kan nula tlangvalte chunga hleihluak taka kutthlakna a awmte hi na kan ti a, kan tih ve theih chhun an tan kan ti ve dawn a ni," tiin Vanglaini a hrilh a, Mizo mipuite chu GPYD charity concert kaltlanga luang chhuak ve turin a sawm.

He concert-ah hian hranghlui zaithiam, Khawpui Mawi tih hla larpui em emtu Upa Rodingliana, Mizo Idol-a hming lo chher tawh C. Muani & Omomi Khiangte, Pentecost Fakzai pahnihna Rebek Vanlalnunpuii leh Vanlaltlansaa te chu zai tur zingah an tel.

Mizoram UPC hian May 14, Pathianni zana tualchhung kohhran hrang hrang thawhlawm tlingkhawm chu Manipur buaina avanga harsatna tawkte pualin an lo hlan tawh bawk a ni.