Praise On 2022-a 1-na Malsawmdawngzuali hla thar tur chu

Praise On 2022 Mal Zai intihsiaka pakhatna, Tlangnuam West nula, Malsawmdawngzuali (Mali)music video hmasa ber "Siamtu Duan reng a lo ni" tih chu zanin hian tlangzarh a ni dawn ta!

KṬP branch hrang hrang aṭanga mi 300 chuang telna, Praise On 2022 intihsiaknaa zaithiam bera thlan, Mali thiam zia sawinawn a ngai tawh lo a, aw chak leh nghet ṭha tak a nei a, hla sangah a buai ngai meuh lo.

"Siamtu Duan reng a lo ni" tih hla hi Upa V.Thangzama phuah niin a thluk pawh hi aman a siam nghal a ni. Rimawi lama sulhnu nei ṭha –Lal K Sailo chuan music hi siamsakinin, Ramhlun North tlangval Ruatdika'n guitar a perh sak bawk. Sammy Khawlhring chuan video a siamsak a, Liandingpuia'n aerial a shoot sak thung a ni.

Mali hla thar hi zanin dar 6:45 hian Zonet Zawlbuk leh, zan dar 7-ah MDM YouTube Channel-ahte ngaihthlak theih a ni ang.

"Ni leh thla leh arsi ho te

An herchhuak an herliam ṭhin

Pianga puitling ral leh mai te

Siamtu duan an ni asin

Danglam zela kan hmuhte hi

Chatuan tihlutu an ni

Kan Pathian a danglam ngai lo

Mihring a ensan ngai lo."