Mizoramah India lamthiam rual an fuankhawm dawn e
Mizo Dance Camp leh Mizoram State Sports Council ṭangkawp chuan June 27 - 30 inkar hian lam lama tuimite tan Mizoram Dance Sports & Movement Championship a buatsaih dawn!
He event-ah hian intihsiakna hrang hrang a awm dawn a, Dance battle bikah hian India rama top dancer-te chu endik tur leh, showcase nei turin an lo kal dawn a ni. Crew Battle-ah hian hmarchhak state hrang hrang aiawhin crew an rawn kalkhawm bawk ang.
Showdown Dance Battle
Showdown dance battle atana main event hi Breaking a ni. Breaking hi Olympics Sports a lakluh tawh a nih angin, a endik tur hian Bboy Flying Machine a lo kal dawn. Ani hi India-a number 1 ni lai leh Olympics-ah pawh India aiawh tura hma theh zinga mi a ni. Hemi bakah hian Hip Hop Dance Battle-ah Tanuj chu Judge turin a lo kal dawn bawk. He Mumbai val hian India aiawhin International-ah pawh sang tak a lo thleng tawh a ni. Rep Your Style battle hi India hmeichhe street dancer-a a ber zinga mi, Gujarat lamthiam Srilakshmi chuan a rawn judge vang.. An pathum hian Crew vs Crew battle an judge bawk ang.
Jump Rope
Jump Rope Freestyle, Male leh Female Open Category buatsaih tel a ni dawn. Samuel Liansanga chu Judge tur niin, kum bithliah awm lovin jump rope thiamte tan duh ang tawka in show theihna hun siam a ni ang. Mipa leh hmeichhe category a ṭhenin, lawmman hi siam a ni.
Aerobics
Mizorama kan la neih ngai loh, aerobics championship buatsaih tel a ni dawn bawk. Group leh solo category siam niin, hetah hian aerobics set, mahni theihna leh thiamna, flexibility leh creativity show na hun a ni dawn a, Gymnastic acrobatic leh fitness aerobics te pawh a leng vek ang.
Group ah hian member 4-8 inkar tel theih a ni dawn a, solo-ah hian kum bithliah awm lovn a duh apiang tan a tel theih thung. Endik tur hian Mizorama kan aerobics & fitness instructor neih ṭhat ber ber: Nutei Pautu, Esther Chhakchhuak leh Misty Hruaii te an ṭhu dawn a ni.
Hei Raw Dance Competition
Group dance competition buatsaih a ni bawk dawn a, crew te, college dance club leh school dance team te tan tel theih a ni. Member 4 - 10 inkar tel theih niin, Round 3 a awm ang a, round hmasa ber hi Online Video Round niin, semi final leh final round a awm leh ang. Judge tur zingah hian Alan Rinawma, MDC Founder & Creative Director pawh a tel.
MDC Showcase
June 30 hian Dawrpui Multipurpose Hall-ah intihsiakna zawng zawng final round leh, Mizo Dance Camp Showcase neih a ni ang. MDC Team-ten lam hmuhnawm tak tak an entir bakah MDC zirlai ten performance an nei dawn a, he performance atan hian Summer Intensive buatsaih a ni dawn a, June 1 hian class ṭan a ni ang.
Intihsiakna neih tur zingah hian hengte hi a tel ang:
- Showdown Dance Battle
- Jump Rope Championship
- Aerobics Championship
- Hei Raw Dance Competition
Lawmman ṭha tak tak awmin, tangkafai Rs. 3,00,000/- semchhuah a ni ang.