SUZUKI 2-WHEELER HLUI A THARA THLENG THEIHNA SHOWROOM HAWNG

Mipui tan thil awlsam a nih beiseiin, LBS Suzuki chuan nimin khan Bawngkawn South, Aizawlah lirthei hlui a thara thleng theihna Best Value showroom an hawng.

Suzuki Motorcycle India East Zone Service manager, Anupam Singh San chuan ribbon chep chatin LBS Suzuki Best Value hi a hawng a, Mizoramah lirthei hlui a thara thleng theihna showroom hmasa ber a ni nghal a ni.

LBS Suzuki managing director, H. Ngurdingliana chuan tun dinhmunah chuan Suzuki two wheeler bik chauh a thleng theih dawn a, eng company siam pawh ni se a thara thleng thei turin ruahmanna an siam tih a sawi.

Lirthei hlui hlut zawng an chhutsak hmasa a, chumi chu ringin a thara thleng turten pawisa an pek belh a ngai a, mi malin an duh ang anga lirthei hlui an hralh chhawn leh ṭhin aiin hetianga company-in mumal taka thil a kalpui hi a him bik a ni.

Suzuki Motorcycle chuan mipui tan awlsamna ni tur leh, an sumdawnna huang zauh zel nan India rama dealer thlan bik panga hnenah lirthei hlui a thara thleng theihna Best Value kalpui turin a ti a, heng zingah hian Mizoram dealer LBS Suzuki telin eng emaw chen hlawhtling taka hma a lak hnuah official-in Best Value showroom pangngai an hawng ta tih Ngurdinga chuan a sawi.

Tun dinhmunah LBS Suzuki hi Mizoram two-wheeler dealer hrang hrang zinga hralh tam ber niin, April thla khan lirthei 714 an hralh a, tun thla kal mekah 800 lai an hralh chhuak leh tawh a ni.