Sushant Singh thihna thubuai
Sushant Singh Rajput thihna thubuai kal zelah Central Bureau of Investigation (CBI) chuan mi paruk lakah thubuai an ziak lut a, heng zingah hian Sushant Singh-a ngaihzawng Rhea Chakraborty pawh a tel.
Lemchan thiam tho, a bialpa thihna chungchanga dem hlawh tak Rhea hi nimin khan Mumbai-a Enforcement Directorate (ED) office-ah a inlan nghe nghe.
Sorkar laipuiin CBI kuta Sushant Singh Rajput thihna thubuai hlan a remtih tuk lawk, Ningani khan Bihar Police-te'n FIR an lo file tawh behchhanin CBI hian mi paruk lakah thubuai hi an ziaklut nghal a, Rhea Chakraborty mai bakah hian a chhungte dang pawh an tel a ni.
CBI chuan Rhea, a pa Indrajit Chakraborty, a nu Sandhya Chakraborty, a nuṭa Showik Chkaraborty, Sushant-a house manager Samuel Miranda, Shruti Modi leh midang a hming tarlan loh lakah thubuai hi an ziak lut. Superintendent of Police Nupur Prasad kaihhruai special investigation team chuan thubuai hi an chhui dawn a, IPS senior officer pahnih DIG Gagandeep Gambhir leh Joint Director Manoj Shashidhar-te chuan an vil dawn bawk.
Sushant-a bialnu Rhea hi Sushant-a chhungte hian a thihnaah a inhnamhnawih niin an puh a, pawisa tam tham tak a inthawn tir bakah a rilru pawh a chawkbuai hle niin an puh.
Enforcement Directorate chuan Rhea Chakraborty hi rs Vbc 15 vel lai a account-a transfer a nih chungchangah thu an zawt chiang dawn a ni.
Mi ṭhenkhat chuan Sushant Singh Rajput-a bank account pali zinga pahnih aṭangin Rhea Chakraborty hian pawisa hi a dawng tih an sawi a, mi ṭhenkhat chuan Rs Vbc 15 em em a ni lo ni te pawhin an sawi ve bawk. Sushant Singh Rajput hi June 14 khan Mumbai-a a chenna inah a inawlhlum niin Mumbai Police-te chuan an sawi a, mahse mi tam tak chuan Mumbai Police-te hi an ring zo tawh lo a ni.