billboard: Morgan Wallen-a'n Taylor Swift record a khÛm ta!

Khawvela music chart ngaihhlut ber, Billboard 200 chart-ah Morgan Wallen chuan kar liam ta khan record thar rawn siam lehin, a album thar ber "One thing at a time" chu a zawnin kar 12 chhung pakhatna a ni ta. Kar 11 chhung pakhatna ni thei Taylor Swift "Fearless" record duhawm tak chu a rawn khum ta a ni.

Country album huang bikah Miley Cyrus pa, Billy Ray Cyrus kha kum 30 liam ta, 1992 khan "Some Gave All" hmangin a zawnin kar 17 chhung zet pakhatna a lo ni tawh a, Wallen hian he record duhawm tak khum tur hian kar ruk hun a la mamawh ang.

Taylor Swift "Fearless" a khum ta

"One thing at a time" hian kum 2008-09 inkara kar 11 chhung pakhatna ni thei- Taylor Swift album "Fearless" chu rawn khumin, kar liam ta khan equivalent album unit 1,29,000 lai a hmuchhuak. Wallen hian album pahnih tichhuak tawhin, heng album pahnih hi kar 22 chhung chart-ah pakhatna a hauhpui tawh a, album hmasa zawk "Dangerous: The Double Album" khan kar 10 chhung chart chung ber a lo luah tawh bawk a ni.

Chart a danglam tam lo

Billboard Woman of the year 2022, SZA album "SOS" chu May 29 khan CD leh vinyl-a tlangzarh a nih avangin hralh a rawn kal thar leh hle a, equivalent unit 77,000 hmuchhuakin pangana aṭangin pahnihnaah a rawn invawrh chho a ni. Swift chuan "Midnights" additional bonus track a zehtelna 'deluxe edition' tichhuak bawk mah se, a rah erawh kar leh lamah a hriat chauh thung ang.

Hmel thar

Dave Matthews Band "Walk Around the Moon" chu panganaah a rawn debut a, Billboard 200 bikah top 10 album 14-na chiah a ni. Ghost pawhin an top 10 album palina ni turin "Phantomime" chu pasarihnaah an rawn debut bawkin, anni pahnih chauh hi hmel thar lang awmchhun an ni.