Manipur buaina avanga Charity Concert a hlawhtling

General PYD, Mizoram UPC-in May 30, Thawhlehni zana Manipur buaina avanga harsatna tawkte puala charity concert a buatsaih chuan ngaihhlut a hlawh hle a, he thu buatsaih a nih thleng hian Rs. 3,00,000 chuang a lut tawh.

Mizoram UPC General Hqrs. Conference Hall-a Charity Concert hi sawm bikte tana chhim theihin ruahmanna siam a ni a, GPYD YouTube channel lamah live-a pekchhuah a ni bawk.

He hunah hian zaithiam chuai thei lo Rodingliana, Lalṭhazuali, Vanlalhruaia, Lalnundiki Sailo, Vanlalduhsaka,Mizo Idol hmasa bera hming lo chher tawh C.Lalmuanpuii,Gershom Lalṭanpuia, K.Lalnunpuii, Vanlaltlansaa,Rebek Vanlalnunpuii leh 'Ka hre reng ang' tih hla thar rawn 'hit' pui mektu Omomi Khiangte, Mizo Idol 2022 top 20 zinga mi Zoremtluanga, Zothanmawii, MYC Perhkhuang aṭanga hriat hlawh C.Lalngaihawma leh Lalhmudiki te an zai a ni.

Zaithiam tak tak zai bakah hian, Manipur-a harsatna tawktu Pastor Lalliansanga, Pastor Koko Lalmalsawma leh Marshall S. Manghmingthanga te hnen aṭangin Manipur buaina chungchang report ngaihthlak a ni bawk.

GPYD president Upa R. Vanlalruata chuan, "Manipur-a chi leh chi inkara buaina avanga harsatna hian kan unaute a nghawng na takzet a, an chunga thil thleng tam tak chu ngaihthlak leh thlir ngam pawh a ni lo.

"An tan kan tihve theih tawk ti turin GPYD chuan rimawi hmangin hma kan han la ve tawp a ni a, kan unaute tana ui nei miah loa lo luang chhuak zawng zawngte chungah lawmthu kan sawi tak meuh a ni," tiin Vanglaini a hrilh a, an sum hmuhte chu a ṭangkai thei ang bera hman a nih tur thu a sawi bawk.