Mars aṭanga Alien message ni thei ngeia ngaih chu!

Mihringte hian kan chenna leilung piah lam chhuizui a, van thengrengah nunna dang awma hriatna lian tak kan nei ṭhin. Khawvel hmun hrang hranga space agency-te chuan planet dangah keini mihringte anga khawsa ho dang an awm em tih zawngin space mission eng emaw zat an lo kalpui tawh ṭhin a, lo awm ta se engtin nge min lo biakpawh ang tih thlengin zirchianna an kalpui ṭhin.

Hetiang thil thlen thulhah European Space Agency (ESA) chuan ExoMars Trace Gas Orbiter hmangin Mars-ah 'mock' signal an thawn ṭhin a ni. May 24, zan dar 9 khan agency hnuaia 'A Sign in Space' project-ah encoded message hi a rawn de zawk tih an sawi a, alien message ni theiin an ngai.

"Mihringte hian van thengrengah thil chak leh mak danglam tak zawngin hun an lo hmang tawh ṭhin. Planet dangah nunna neia khawsa ho kan hmuhchhuah theih chuan keini mihringte tan kalphung sawidanglamtu a ni thei dawn a ni," tiin project khaipate zinga mi Daniela de Paulis chuan a sawi.

ESA spacecraft hian October 2016 aṭangin Red Planet-ah thil nung zawngin a lo helkual (orbit) tawh ṭhin. ESA chuan May 10 khan an spacecraft mission control centre Darmstadt, Germany aṭangin message an thawn thu leh, 'telemetry' (data)-ah letin khawvelah beam hmangin lo thawn thlak leh a ni tih a sawi. "Ram hrang hranga heti lam thiam bikna neite chu code hi letling a, a awmzia sawifiah tura ngenin, uluk taka vawn ṭhat a ni ang," tiin ESA chuan a sawi.