Fantastic Four a chang tur te chu

Marvel chuan official-in 'Fantastic Four' film thara chang tur te hming la tarlang lo mah se, a chang turte ruangam chu a hriat dawn hnai ta.

February 2025 daiha tlangzarh tura ruahman mah ni se, film ngaihnatute beng a verh ṭan der tawh a ni.

MCU Insider MyTimeto-ShineHello-in a tarlan danin, film-a changtu tura chhawp-chhuah te chu–Adam Driver, Margot Robbie, Paul Mescal leh Daveed Diggs-te an ni.

"Aftersun" actor hian Chris Evans leh Michael B. Jordan-te hnung zuiin, Johnny Storm a.k.a. Human Torch lem a chan a rinawm a, Diggs erawhin Ben Grimm a.k.a. The Thing role la tura sawi rik a ni thung.

Hetih lai hian Barbie actress Margot Robbie chu Sue Storm a.k.a. Invisible Woman a chang tur leh, "Star Wars: The Rise of Skywalker" star Adam Driver chu Reed Richards a.k.a. Mr. Fantastic-a chang tura sawi rik a ni bawk.

Disney chuan D23-an neih ṭumin, "WandaVision" director Matt Shakman chu film hi buaipuitu tur a nih thu an sawichiang tawh nghe nghe. Heng mi palite hi tunlaia lemchan khawvela a ṭha zual thlan khawm tih theih an ni a, an thawkho thei a nih ngat chuan a entu tam tak a hip phah ngei ang.