Ariana Grande-in documentary film tlangzarh dawn

American pop singer lar Ariana Grande chuan kum 2019-a Sweetener World Tour a neih chu 'documentary film' anga thlangzarh a tum tih The Sun chuan a tarlang.

He documentary film chungchangah hian Ariana team-te leh Netflix-in inbiakna an kalpui nia tarlan a ni a, Netflix lam hian an channel-ah he film hi an chhuah theih nan euro maktaduai 4 an offer nia sawi a ni bawk. Documentary film atana siam tum Sweetener World Tour hi nikum March 18 aṭang khan Ariana hian bul a lo ṭan tawh a, December 22 khan a zo fel leh hman bawk a ni.

Hmun hrang hranga Sweetener World Tour a neihnaah hian chhimtute mi mktaduai 1.3 chuang an awm. He tour hi Ariana studio album palina Sweetener promote-na atan a nih bakah a studio album pangana Thank U, Next promote-na a ni tel bawk. Hemi tour aṭang hian show 97 aṭangin $maktaduai 146.6 a la lut niin Box office chuan a tarlang.