Zorini Khiangte hla thar zaninah

Zorinzuali Khiangte chuan zanin hian music video thar 'Valmawi' a tlangzarh dawn a,  EME Records YouTube official channel-ah thlira ngaihthlak theihin a dah dawn.

Mizo lengzem singer zinga hriat hlawh ber pawl Zorini Khiangte hla thar 'Valmawi' tih hi VL Awia phuah a ni a, T Melody hla eng emaw zat kha a kut chhuak a nih bakah, Ṭhazual Lengzem chart-a No.1 pawh lo ni zak zak tawh Fela Colney sak, 'Tun lai Lanu' phuahtu kha a ni bawk nen, 'Valmawi' pawh hi ngaihthlak a manhla leh hle ang.

'Valmawi' music video hi Siama (Hebron Picture) kut chhuak a ni a, Music and records hi Thangbawiha (EME Records) kut chhuak a ni ve bawk. Zorini hi EME Records nen hian an thawk dun fuh ṭhin hle a, Kima Chhangte hla 'Rinawm te in' an tihchhuah phei chuan YouTube-ah thlirtu maktaduai chuang a nei a ni. A music video hrim hrim hi a 'hit' ṭhin a, 'Aw Duhlai' khan thlirtu maktaduai chuang nei tawh bawkin 'Ka Phal lo' phei chu mi maktaduai 1.2 chuangin an thlir tawh a ni.