Martin Scorsese-a'n Isua film siam a tum

“The Last Temptation of Christ" director, Martin Scorsese chuan Isua film siam a tum leh tih a sawi.

Hollywood film director hmingthang, Goodfellas (1990), Shutter Island(2010), The Wolf of Wall Street(2013) bakah film eng emaw zata a kuthnu kan lo hmuh tawh, Martin Scorsese chuan Isua Krista chanchin film a buaipui tur thu a sawinaah, Cannes Festival zawh hnua Italy a tlawh ṭuma Pope Francis nen an inkawmna aṭangin hetiang ngaihtuah hi a nei tih Martin Scorsese chuan a tarlang. A nupui Helen Morris nen hian kar liam ta Inrinni khan Vatican-ah Pope hi an hmu a ni. "Pope ngenna angin Isua chanchin chu film puitlinga siam turin ka inbuatsaih mek a, ṭan thuai pawh ka tum," tiin a sawi.

Kum 80 mi, film director hian "The Last Temptation of Christ" leh Jesuit Christian-te chanchin tarlanna "Silence" te pawh lo siam tawhin, sakhuana hian ngaihtuahna thar a pek ṭhin thu leh, phurna thar a dawn phah ṭhin thu a tarlang.

Cannes Film Festival neih zawh takah khan Scorsese-a film thar, 'Killers of the Flower Moon' chu premier a ni a, he film-ah hian Leonardo DiCaprio, Robert De Niro, Lily Gladstone leh Jesse Plemons-te an chang. Scorsese leh DiCarpio-te hi he film bakah, Gangs of New York, Aviation, The Audition leh The Wolf of Wall Street-ahte an lo thawkdun tawh a ni.

'Killers of the Flower Moon' hi true story behchhana siam niin, October 6 hian theatre-ah tihchhuah a ni ang.