Hollywood Walk of Fame-ah Tupac Shakur

Rap icon, Tupac Shakur chu a thih aṭanga kum 26 hnu, June 7 hian Hollywood Walk of Fame-ah lakluh a ni dawn.

Tupac Shakur hi a thih hian kum 25 mi a ni a, a thihna rei tawh mah se tun thlengin rapper hlawhtling leh huhang ngah ber zingah chhiar tel a la ni reng.

Hollywood Walk of Fame producer Ana Martinez chuan, Tupac Shakar kha rapper a nih bakah actor, activist, poet leh revolutionary a ni tih sawiin, he artist ropui tak hian a thih hnu kum tam takah pawh midangte hneh theihna a la nei reng a, hun lo kal zelah pawh cultural figure pawimawh tak a la ni zel dawn a ni, tiin chawimawi a nih tur thu a puannaah a sawi.

Ana chuan Tupac-a star chu hmun hrang hranga rap fan-te ngaihhlut leh an tlawh nasat tur a ni ngei dawn tih sawiin, star tlawh tam ber zingah a tel chhoh ngei a rin thu a sawi bawk. Tupac-a star hi Walk of Fame star 2,758-na tur a ni.

June 7-a Los Angeles-a hip-hop star chawimawina hun hi Los Angeles radio presenter, Big Boy chuan kaihruaiin, director Allen Huges leh writer Jamal Joseph-te chu guest speaker an ni dawn. Chawimawina hi Tupac-a farnu, Sekyiwa "Set" Shakur chuan a dawnsak ang.

Shakur, a stage name 2Pac hian kum 1991 khan a debut album tichhuakin, chart lamah a hlawhtling chho nghal hle. A hit neih zingah California Love, All Eyez on Me, Changes leh I Ain't Mad at Cha-te an tel. A record-te hi khawvel pumah copy mtd 75 hralh chhuah a ni. Lemchan lamah pawh sulhnu a nei bawk a, "Juice," "Poetic Justice," "Above The Rim," "Gridlock'd," leh "Gang Related"-ahte changin, fak pawh a hlawh hle. Hei bakah hian a music leh art hmangin Black American-te dikna chanvo humhalhna kawngah a bei ṭhin bawk.

Tupac Shakur hi kum 1996, September 13 khan Las Vegas-ah kahhlum a ni. A thih hnu, kum 2004-ah a single Ghetto Gospel tihchhuah a ni a, UK singles chart-ah number one dinhmun a hauh thei a ni.