Pa Hausa an peih fel ta

In-House Production chuan an film 4-na tur, Pa Hausa 'Ka Aim in Life' tih chu an peih fel leh ta a, en theih tura chhawp chhuah a ni thuai dawn.

Tunlai lemchan thiam tak Papuia Pachuau chu a changtupa ber a ni a, Sangsangi bakah, Joe Pachuau, Sangpuia te chu lead role la tur an ni. In-House Production khaipa ber, Drew Pachuau chu director ni lehin Pa Hausa film hi Samuel L Pachuau ziah a ni leh bawk.

Director Drew Pachuau sawi danin, he film hi a ṭha lam zawnga midang zirtir leh kaihruai thei lam a ni dawn a, Emotional Rollercoaster a nih dawn thu a sawi. A film hmasa te aiin comedy a tam a, ṭhalaite cho phur thei tur a tam zual bakah, plot twist danglam tak an zeh tel thu a sawi bawk a ni.

Pa Hausa hi Mini Series angin tihchhuah a ni dawn a, Episode 4 a awm dawn a, Lersia Play-ah en theihin dah a ni dawn. June ni 9 zan hian Aizawl leh Serchhipah premiere a ni nghal dawn bawk a ni.