Jisoo-i'n Covid-19 hri a kai; Japan concert-ah a tel ve thei dawn lo

K-pop band lar Blackpink member, Jisoo chu Covid-19 hri a kai tih hmuhchhuah a ni a, hei vang hian vawiin leh naktuka World Tour, Japan-a an neih turah a inlan ve thei dawn lo.

Blackpink agency, YG Entertainment chuan Jisoo hi ni hnih chhung a hritlang a, vawi hnih a in test hnuah, June 1 khan Covid-19 hri a kai tih hmuhchhuah a nih thu a sawi.

Hri a kai avang hian kum 28 mi, Korean singer hi an band-in June 3 leh 4-a Born Pink World Tour show, Japan-a Osaka khawpuia an neih turah a inlan thei dawn ta lo a, band member dang pathum - Jennie, Lisa leh Rose-ten programme hi an kaltlangpui ang.

Jisoo chuan Blackpink fans-te hmaa inlan a chak hle rualin, a hriselna leh midang himna tur ngaihtuahin concert an neih turah hian inlan ve loh a tum ta a, fans-te hriatthiamna pawh a dil nghal tih YG Entertainment chuan a tarlang.

Blackpink hian kum 2016 khan a album hmasa ber, Square One an tihchhuak. Tunah hian an album hnuhnung ber, Born Pink chawilarna atan Born Pink World Tour Asia leg an nei mek a, China leh Thailand-ah concert hi an nei tawh a ni.