Snoop Dogg leh Dr. Dre ten writer nawrh huaihawtte tan food truck thawn

Snoop Dogg leh Dr. Dre te chuan nawrh huaihawt mek, Writers Guild of America (WGA) an thlawpna lantirin, Zirtawpni liam ta khan food truck tirin, a thlawnin ei tur an sem.

'Gin and Juice' rapper leh 'I Need a Doctor' spitter-te hian Los Angeles-a Paramount Studios-a writer nuar mekte tan hian food truck hi tirin, 'Bagels sponsored by Snoop Dogg and Dr. Dre' tih note an thawn tel bawk. Writer-te chu an thlawp thu sawi bawkin, Alliance of Motion Picture and Television Producers (AMPTP) chuan inremna a siampui thuai a, an hna an thawh chhunzawm theih leh thuai an beisei thu an sawi bawk.

WGA-te tana food truck an thawn hma hian, Snoop chuan Dr Dre nena 'Doggystyle' 30th anniversary concert an neih tur an sawnhlat thu a sawi. Concert hi June 27 leh 28-a Hollywood Bowl-a neih tura ruahman a ni a, mahse October 20 leh 21-ah an sawn a ni. An concert an sawnhlatna chhan pawh hi WGA nawrh huaihawt vang a ni tih a sawi.

Writers Guild of America hian kar nga chhung nawrh an huaihawt tawh a, celebrity tam takin nawrh huaihawtte hi an thlawp thu an sawi lang tawh bawk. WGA-ah hian film, television, radio leh online media-a writer-te an tel a, May 2 aṭang khan AMPTP in writer-te hlawh leh sum lakluh a tihtlem sak nia sawiin nawrh hi an huaihawt a ni.