A chung berah Angela ‘Hmangaihna par’

Khiangte Construction Ṭhazual Lengzem chart thar berah, Angela Malsawmpari hla, 'Hmangaihna par' chu a chung berah a rawn invawrh chhuak.

Mizo Idol season 7 star, Angela Malsawmpari hian hla hit leh mawi tak tak a lo tichhuak tawh a, a music taste pawh a danglamin a hawl zau viau zel. A hla thar, "Hmangaihna par' hi May thlaa a tihchhuah a ni a, a hit chho nghal hle. He hla phuahtu hi Chama Khawlhring a ni a, music hi Kima Chhangte kutchhuak a ni. Tluanga Hnamte (Westend Studio-ah) recording tih niin, video hi Milestone Pictures shoot-sak a ni. Ngaithlatu leh duhtu an tam tih a chiang a, chart hmasa lama pasarihna a nih hnuin pakhatnaah a rawn invawrh kai thei a ni.

Chart hmasa lama 10-na, Zodini ft. Vanzara 'Chung Khuanu kutchhuak' pawhin nasa taka hma rawn sawnin, pahnihnaah a awm. Ani ang bawkin Mercy Remsangmuani hla, 'Khaidiat' pawh pakuana aṭangin pathumnaah a rawn lang thei bawk. Vanlalduhawma, 'Kawrthindeng' chu chart-ah rawn lang tharin, palina a rawn luah nghal a, YMA Sub. Hqrs. Zaipawl (2022-2023), Serchhip chuan 'Kan duai lo' tih hmangin top 5 an khar.

Top 10-ah hian B. Lalpianmawia, The Radio, Bektei, Lalṭhakima (Akima) leh Kimdongi X Ez Kid-te an lang bawk.