Mizo Hit Charts buatsaih dawn

Zo Events Organisation leh Runmawi App ṭangkawp chuan Mizo zaithiamte tan, pawl bik thliar loin Mizo Hit Charts a buatsaih dawn. May 2023 aṭanga ṭanin, thla tin Hit Charts hi tihchhuah an tum.

Hit Charts thlanna atan hian Youtube-a thlirtu ngah chu tehfung atan an hmang dawn a, Lengzem/Lenglawng category leh Gospel category a awm ang. Caterogy pahnihah hian Top 10 an thlang chhuak dawn a, Top 3 chin hnenah cash prize leh memento pek ṭhin an ni ang a, a bak Top 10-a lang dangte chu memento pek vek an ni bawk ang. Chart-a top position hauhtu hla phuahtute chu thilpek an hlan ṭhin dawn bawk.

June 9 hian inaugural program neih a ni dawn a, Top 10-a tling zinga mi zaithiamte an zai dawn a, lawmman sem a ni ang. Runmawi App leh Youtube-a thlir theih a ni ang.