Baahubali film siamna atan Rs. vbc 400 loan puk

SS Rajamouli film, Baahubali franchise hlawhtlinzia kan hria ang a, mahse, mi tam zawk chuan he film siam puitling tura sum lama a buai dan erawh kan hre kher awm lo e.

Baahubali film changtu zinga pakhat, Rana Daggubati chuan tun hnaia interview a neihah, film-maker-te'n loan, Rs vbc 400 zet an puk thu a sawi chhuak.

Rana chuan film siam a risky thu leh, film-maker-te'n a pung sang tak taka sum an puk ṭhin thu sawiin; Baahubali film siamtute chuan kum nga chhung atan 24%-a pungin Rs vbc 400 an puk a ni, a ti. Baahubali 1 leh 2 siamna atan hian Rs. vbc 480 sen a ni a, film siam tawha senso tam ber zingah a tel a ni.

SS Rajamouli chuan Baahubali:The Beginning kha pan-Indian film hmasa ber niin, Tamil Nadu, Kerala, North India, America leh UAE-ahte an release tih a sawi. Hmun dangah chuan an lo dawnsawn ṭhat hle laiin, an target ber Telugu ṭawng hmanna state-ahte erawh a tla na lo hle a, mi tam takin film industry-a thil thleng chhe ber nia sawite an awm a ni, a ti. Mahse, khawvel huapin a che ṭha hle a, Rs. vbc ₹565.34 - 650 vel lalutin, Baahubali 2: The Conclusion khan khawvel pumah Rs. vbc 1,737.68 - 1,810.60 lalut bawkin, Indian film zingah khawvel huapa sum lalut hnem ber a rawn ni thei a ni.