US Box Office : Spider-Man Across The Spider-Verse a chungnung nghal

‘Spider-Man: Across The Spider-Verse' chu tlangzarh a nih karah US box office-ah a rawn chungnung nghal a, USD mtd 120.5 lalutin, tihchhuah a nih karah animated movie zinga sum lalut hnem ber dawttu a ni. A kar khatnaa USD mtd 146 laluttu, 'The Super Mario Bros' Movie' erawh a phak ta lo.

'Spider-Man' film zingah 'Spider-Man: Across The Spider-Verse' hi tlangzarh a nih kara sum lalut tam pathumna a ni bawk. Sony animated sequel hian international box office-ah territory 59 aṭangin USD 88.1 a la lut bawk a, China aṭanga lut tam berin USD 17.3 a hmu pha. Heti hian June ni 2-a tlangzarh a nih hnuah, tihchhuah a nih karah hian khawvel huapin USD mtd 208.6 a lalut tling nghal der.

Joaquim Dos Santos, Kemp Powers leh Justin K. Thompson-te direct, PG-rated movie hi a siamna atan USD mtd 100 vel an seng a ni. Critics lam pawhin an fak hle a, Rotten Tomatoes-ah 95% average hmuin, audience-te'n CinemaScore 'A' an pe bawk. “Guardians of the Galaxy Vol. 3" tih lohah, superhero movie zingah hetianga fakna dawng awm chhun hi a la ni.

Newcomer dang a la awm

Box office chart-ah newcomer dang a awm bawk. Disney and 20th Century film, 'The Boogeyman' chu pathumnaah a rawn lang a, theatre 3,205 aṭangin USD mtd 12.3 a lalut. International box office-ah USD mtd 7.7 lalut bawkin, a sum hmuh hi USD mtd 20 a tling. He film hi Stephen King short story behchhana siam a ni.

Chart hmasaa pakhatna, Disney's The Little Mermaid' chu pahnihnaah tla thlain, kar hnihnaah hian theatre 4,320-ah chhuah chhunzawm a la ni a, USD 40.6 a la hmu pha a, mahse tlangzarh a nih kara a sum hmuh aiin 59% zetin a tlahniam tawh. International box office-ah USD mtd 140 a la la lut a, a sum lak luh belh khawm hi USD 326 a la tling.

Top 5-ah Disney movie 3 a lang

Box Office top 5 zingah hian Disney movie pathum an lang a, Marvel's “Guardians of the Galaxy Vol. 3” chuan USD mtd 10.2 lalutin palina a la hauh a ni. He superhero threequel hian US-ah USD mtd 332 leh, khawvel pum huapin USD mtd 780 a lalut tling tawh. 'Fast X' chuan top 5 a rawn khar a, US-ah USD mtd 128 lalutin, international box office-ah USD mtd 474 zet a la hmu chhuak thei.

Box Office Top 10

1. Spider-Man : Across the Spider-Verse

2. The Little Mermaid

3. The Boogeyman

4. Guardian of the Galaxy Vol. 3

5. Fast X

6. The Super Mario Bros. Movie

7. About My Father

8. The Machine

9. You Hurt My Feelings

10. Kandahar