Folina Chongthu ‘Hmelṭha, i tan’ a chhuak ta

Hranghlui zaithiam Peter C. Lalrinmawia fanu, Folina Chongthu chuan music video thar, 'Hmelṭha, i tan' tih chu Zonet-ah en theihin a tichhuak ta. MDM library-ah pawh dah a ni tawh a, zanin hian a Youtube channel-ah a chhawp chhuak dawn bawk.

'Hmeltha, i tan' tih hi Folina Chongthu hla pahnihna niin, ama phuah leh thluk siam ngei a ni. Music producer hi 'Ramliana hla' thiam taka siamtu, Ben Opa a ni. Videographer hi Mizo film hmuhnawm tak tak, Amawii, Ka U Liana, Nutei Thingpui Dawr tihte lo siam tawhtu, Zote Entertainment team-a mi Mike a ni. Social media lama kan hriat lar, Teddy Sailo leh Rody_5 te an rawn lang bawk a, a hmuhnawmin en a nuam hle.

Folina Chongthu chuan,”He hla hi 2022-a ka phuah a ni a, kum 10 vel ka nih aṭangin thu leh hla ziah lam ka tui em em a, ka inhnemna ber a ni. Tun hnuah hian mahni hla phuah ngei sak hi ṭha ka tichho ta a, Music Video ka siam chho ve ta zel a, ka hla phuah hi a la awm nual avangin siam chhoh zel ka tum bawk,” a ti. College level competition-ah pawh thu leh hla inziahsiakah lawmman a lo la ve nual tawh a ni.