Tom Holland-a'n lemchan khawvel aṭangin chawlh la dawn

'Spider-Man: No Way Home' star, Tom Holland chuan tunhnaia interview a neihah, lemchan khawvel aṭangin kum khat chawlh a la dawn tih a sawi.

Kum 27 mi, Holland hian psychological thriller "The Crowded Room" a chang zo a, producer a ni nghal bawk. Mahse, he project hi a hautakin a rilru pawh a seng nasa a, hei vang hian chawlh rih a tum tih US TV show 'Extra'-ah a sawi a ni.

Holland chuan, "Producer nih a, han inzir chhoh chu nuam ka ti hle. Rim taka thawh chu ka tan thil thar a ni hran lo, thawhrim chuan rah ṭha a chhuah tih ring tlattu ka ni ve reng a, mahse, he show hian min ti chau ve a ni. 'Chawlh ka mamawh a nih hi' tih ngaihdan pawh ka nei fo. Hei vang hian kar khat chhung chu Mexico lamah ka inkhung boin, tuipui kamahte ka intithawveng a, tunah chuan kum khat tal chawlh hi ka tum leh ta a ni. Chutiang khawp chuan he show hi a harsain a hautak a ni," a ti.