“Levitating” copyright thubuaiah Dua Lipa-i'n hnehna chang

Los Angeles-a federal court chuan Dua Lipa-i laka "Levitating" copyright thubuai theh luh chu an puhna hi finfiahna a awm lo nia sawiin a titawp.

Artikal Sound System chuan kum 27 mi, pop star 2020 mega-hit, 'Levitating' hi kum 2017-a an reggae single, 'Live Your Life' a copy a ni tiin, Dua Lipa, songwriter Clarence Coffee Jr, Sarah Hudson leh Stephen Kozmenuk bakah leh a label Warner Records-te an khing a ni. Artikal Sound System hi South Africa chhuak niin, kum 2012-a Christ Montague leh Fabian Acuna-te din a ni.

Mahse thubuai ngaihtuahtu, judge Sunshine Skyes chuan Dua Lipa an puhna, an hla an lo ngaihthlak aṭanga "Levitating" hi phuah an ni tiha an puh chungchangah finfiahna a awm lo tia sawiin thubuai hi a titawp a, mahse complaint dang theh luh thar leh erawh a phalsak thung.

Dua Lipa hian 'Levitating' hla avang hian thubuai dang a nei bawk. Song-writer Sandu Linzer leh L. Russel Brown-te chuan nikum khan an disco song, 'Wiggle and Giggle All Night' leh 'Don Diablo' te copy-ah an lo puh tawh bawk a, he thubuai hi court-ah a la kal mek a ni.