MO KAWR (Min kalsan suh) a hnai ta

June thlaah Mizo film thar hmuhnawm tak en tur kan nei leh dawn ta. Mizo film hit leh hmuhnawm, 'Dengi I love you' leh 'Nukawki pasal' tih film siamtu, Conflate Video Production chuan an film thar, Mo kawr (Min kalsan suh) chu an peih fel thawkhat ta.

June ni 23 zan hian 'Mo kawr' hi Lunglei Saikuti hall-ah release leh premier show hun an hmang dawn a, hemi zan vek hian Serchhip auditorium-ah premier a ni bawk ang. Mizorama film apps neih ṭhat ber, Lersia Play lamah June ni 23 zan vek hian chhawp chhuah nghal a ni bawk ang.

Mo kawr film-ah hian a changtu, Zothanmawia leh Zodinpuii chu Agriculture Extention Officer ve ve, thawk dun leh mize in ang lo tak niin, an inhmel duh hnuah kohhran in an loh avangin buainate an tawk chho zui a ni. Chi leh kuang inhmuhsitna bakah, kohhran indiriamnate pawh a thleng chho bawk. Engtin tak awm zel hlawm ang maw?

Mizo hmeichhiate zinga lemchan khawvela kan dah san tak leh kan duh rawn, Rosangpuii Ralte chu a changtunu ber a rawn ni dawn a, Mizo actor ṭha Isaak Chhakchhuak nen an rawn chang dun dawn a ni. K. Vanlalawmpuia bakah tunhmaa zaithiam lar, Vanlalpeki-te pawh kan hmu bawk ang.

He film hi B. Lalbiakvela ziah niin, Director a ni nghal bawk. Director of photography hi Ngaihawma Fanai bawk a ni leh dawn. Audio mastering hi Mathana EFX Audio kutchhuak a ni. Film hmasa lama an lo siam tawh ang bawkin, Mizo background score vek hman a ni leh ang. Conflate Video Production kutchhuak lo en tawhte tan chuan Mizo film chhuak thar tur zingah en chakawm ber pawl a ni ngei ang.