Khiangte Construction Ṭhazual Gospel : Hmahruaitu Arini Ralte leh Zorinsanga Sailo

Ṭhazual Gospel chart-ah No. 1 thar a rawn awm a; Arini Ralte leh Zorinsanga Sailo te thawh dunna, 'Thu chauh sawi la' chu hmahruaitu a rawn ni ta.

Arini Ralte leh Zorinsanga Sailo te hi Praise On 2016-a pakhatna leh pahnihna kha an ni a, an zaithiam zia Zoram mipuite'n kan hre chiang viau tawh. Gospel lama kan top artist pahnihte thawh dunnain chart chung ber a luah hi an phu e.

'Thu chauh sawi la' tih hla phuahtu hi C. Lalchhandami (Damtei) a ni a, a thluk hi Lalzemawia siam a ni thung. HC Recording-ah an record a, video hi Milestone Pictures kutchhuak a ni.

Pahnihnaah Omomi Khiangte-in hun rei tak rimawi lam a chawlhsan hnua a rawn kir lehna hla, 'Ka hre reng ang' tih a rawn lanpui. Mizo Idol 2022-a pahnihna, C. Vanlalroluahtumi (Tumtumi) 'Lungpui nghet' chu top 3-ah a rawn inhlangkai a, palinaah Melody Lalzirliani 'Ka dinna' leh, panganaah One in Christ 'Aw Lalpa' tihte an rawn lang bawk.

Ṭhazual Gospel Top 10-ah hian Divine Voice, Faktu, Maruati, Nancy Zothanmawii leh KṬP, Electric Veng branch-te an rawn lang bawk a ni.