Record thar siamtu 'Val Senior'

Young Fella ft. Zaii Hauchhum & Elza tv 'Val Senior' music video chu YouTube-a an dah chhuah aṭanga ni nga chhung lekin view maktaduai khat a rawn nei thei a, Mizo hla zingah 1 mn view nei rang ber a ni.

Young Fella chuan, "Ka producer ni bawk, ka ṭhianpa Smiley te inah ka leng a, guitar ka perh mai mai chu a hla thluk hi rawn chhuakin, a hlimawm zawngin ka phuah ta thut mai a ni. Phuah chhan em em pawh a awm lo a, ka tum ber zawk chu ka YouTube channel chhe rei lutuk kha video up ve leh nan hrim hrim ka siam a ni," tiin he hla a phuah leh, music video a siamna chhan Vanglaini a hrilh.

'Val Senior' music video hi Young Fella YouTube channel-ah hian June ni 5 zan khan dah chhuah a ni a, ni nga chhungin view maktaduai a rawn nei tling nghal a, Mizo music video tihchhuah tawh zinga view maktaduai khat nei rang ber record a rawn siam der a ni. Hemi hmaa record lo siamtu, ni ruk chhunga view maktaduai khat nei thei pawh Young Fella telna bawk, Rebecca Lallawmsangi nena an thawh dunna, 'Hriat ka duh' tih kha a ni.

Young Fella chuan he hlaa a thawhpui, Zaii Haichhum leh Elza tv-te thawhpui an nuam hle tih sawiin, Booma (Boomerang) leh a videographer, Tea chungah nasa lakin lawmthu a sawi bawk. Viewer-te chungah lawmthu sawi bawkin, "Keini, engmah ni lo tur min lo duhsak a, min lo support ṭhin avangin thinlung takin lawmthu ka sawi a ni. Mi eng emaw tak nite hian ka inhriat ve phah a, a hlu tak zet. Viewer ṭha tak ka ka nei che u hi ka lawm e," tiin Vanglaini kaltlangin lawmthu a sawi. Project hmachhawp pawh a neih thu a sawi a, mahse, a hun tur erawh a la sawi chiang thei rih lo.