Box Office Champion thar - Transformers : Rise of the Beasts

Transformers : Rise of the Beasts chu tihchhuah a nih karah beisei aiin box office-ah a rawn che ṭha a, 'Spider-Man: Across the Spider-Verse' chu No. 1 aṭanga rawn paih thlain, champion thar a rawn ni ta.

Paramount sci-fi film franchise hian tlangzarh a nih karah USD mtd 60.5 a la lut nghal. Tlangzarh a nih hma hian a hmaa mite a tluk loh hlauhthawnna a lian hle a, mahse, 2018-a tihchhuah 'Bumblebee' (USD mtd 21.6) leh 2017-a chhuak 'Transformers : The Last Knight' (USD mtd 44.68) te chu a rawn khum chiang hle.

'Transformers : Rise of the Beasts' hian 'Spider-Man: Across the Spider-Verse' vung chhoh lai tak a rawn lehpel thei a, international market 68 aṭangin USD mtd 110 la lut bawkin, tlangzarh kara khawvel pum huapa a sum lak luh hi USD 170 a tling pha a ni. Steven Caple Jr. direct movie hian CinemaScore-ah audience aṭangin A- leh PostTrak-ah excellent a score thei a ni.

No 2 - 'Spider-Man: Across the Spider-Verse'

Champion thar a awm tak avangin 'Spider-Man: Across the Spider-Verse' chu No. 2-ah a lungawi a ngai. 2018 Oscar winner sequel hi a kar hnihnaah pawh a la che ṭha chhunzawm zel a, USD mtd 55.4 zet a la lut pha a, international market-ah USD mtd 47 a la lut bawk. International box office-a a sum hmuh hi USD mtd 164.5 a tling tawh a ni.

Kar hnih chhunga khawvel huapa a sum lak luh hi USD mtd 226 a tling der tawh a, Sony animated tihchhuah tawh zinga sum la lut hnem ber a ni tawh.

The Little Mermaid Guardians of the Galaxy Vo. 3 leh The Boogeyman

'The Little Mermaid' pawh No. 3-ah tla thlain, theatre lama kar thum tihchhuah a nih hnuah USD mtd 22.8 a lak luh belh leh. Disney live-action movie-ah hian mermaid-ah mi hang hman a nih avangin vun rawng inthliarna lam hawi zawnga beihna pawh a tawk a, international box office lamah a che ṭha chiam lo.

'Guardians of the Galaxy Vol.3' chu No. 4-ah la dingin, USD mtd 7.03 a la lut a, USD mtd 6.9 la luttu 'The Boogeyman' chuan top 5 a rawn khar.