Billboard 200: Stray Kids album '5-STAR'-in No. 1 hauh nghal

Billboard Album chart tharah K-pop group, Stray Kids chuan '5-STAR' hmangin mellung pawimawh tak an rawn phun a, US-ah kar liam ta chhung khan equivalent album unit 249,500 neiin No. 1 an rawn hauh.

'5-STAR' album hi kum 2023-a kar khat chhunga unit hmu tam palina a ni a, album hi 235,000 hralh bawkin kuminah kar khata album hralh tam ber leh, nikum November thlaa Taylor Swift 'Midnights' album hnua kar khata hralh tam ber a ni bawk. Stray Kids hi Billboard 200-ah an lan ṭum thumna niin, an album pathumte hi an lan ṭum khatnaah No. 1 an nihpui thei vek a ni.

Morgan Wallen 'One Thing at a Time' chuan equivalent album unit 117,000 neiin a dinhmun ngai No.2-ah a la awm nghet. Jelly Roll 'Whitsitt Chapel' chu equivalent album unit 90,000 neiin No. 3 a rawn ni a, Top 40 charting release-ah a lan ṭum khatna a ni.

K-pop group dang, ENHYPHEN chuan an album, "Dark Blood" hmangin No. 4-ah an rawn lang leh bawk a, Top 10 album an neih ṭum hnihna a ni. Taylor Swift 'Midnights' chu No. 1 aṭangin No. 3-ah a tla thla thung.

Top 10 zingah album 6 rawn lang thar

Billboard Album chart thara che ṭha zual 10 zingah hian lang thar paruk an awm. Hei hi kum 2020 October ni 10 hnua top 10-a album lang thar paruk an awm lehna hmasa ber a ni.

Top 10-a rawn lang tharte chu No. 1 rawn ni thei nghal Stray Kids '5-STAR' bakah, ENHYPEN 'Dark Blood', Metro Boomin Soundtrack 'Spider-Man: Across The Spider-Verse', Foo Fighters "But Here We Are" leh Moneybagg Yo "Hard to Love"-te an ni.