Grammy Awards-ah caterogy pathum siam belh; Category 95-ah award sem a ni tawh dawn

Music industry lama khawvel huapa chawimawina ngaihhlut, Grammy Awards-ah category thar pathum siam belh a nih thu award buatsaihtu, Recording Academy chuan a sawi.

Category telh tharte hi Best African Music Performance, Best Pop Dance Recording leh Best Alternative Jazz Album te a ni. An telh tharte nen hian category 94 a awm tawh dawn a ni.

Academy hian kumtinin award thar siam leh, vote lak dan chungchang thlak rawtna awmte an ngaihtuah ṭhin.

Grammy Awards hmasa ber chu kum 1959, May ni 4 khan Gramophone Award tiin neih a ni. A vawi hnihna pawh hemi kum vek hian neih ni bawkin, a ṭum khatna atan TV-ah tihchhuah a ni. Mahse live telecast erawh chuan kum 1971-a Awards vawi 13-na neih a nih khan pek chhuah chauh a ni.

Covid-19 hri leng vangin January ni 31, 2021-a 63rd Annual Grammy Awards neih tur chu March ni 14-ah sawn a ni a, 64th Annual Grammy Awards pawh January ni 31, 2022 aṭangin April ni 3, 2022-ah sawn a ni bawk. Awards semna hmun pawh Crypto.com Arena, Los Angeles aṭangin MGM Grand Garden Arena, Las Vegas-ah sawn a ni bawk.

66th Annual Grammy Awards hi nakkum kumtir lamah sem a ni leh dawn a, nominee chu November thla hian puan a ni dawn a, October ni 1,2022 - September ni 15, 2023 inkara hla leh album tihchhuah aṭangin thlan a ni ang.