Avatar, Avengers leh Star Wars Sequel chhuah hun tur sawn

Disney chuan Avatar, Avengers, and Star Wars chhunzawmna an tihchhuah hun tur an sawn hla a, a chhan sawi chiang lo mah se Hollywood writer-te nawrh huaihawt nghawng zel nia rin a ni.

Report chuan 'Avatar 3' tihchhuah hun tur chu kum khata sawn hlain, December ni 19, 2025-ah a chhuak thei dawn chauh tih an tarlang. Avatar 4 chu December ni 21, 2029 leh Avatar 5 chu December ni 19, 2031-ah tihchhuah an ni dawn bawk. Avatar series hnuhnung ber hi a hmasa ber tihchhuah a nih aṭanga kum 22 hnuah a chhuak dawn a ni. Kum 2009-a 'Avatar; hmasa ber siamtu, director James Cameron chuan Avatar 4 leh Avatar 5 chu a direct tawh lo maithei tih a sawi.

Avengers: Kang Dynasty tihchhuah hun tur pawh May, 2025 aṭangin May, 2026-a sawn hlat a ni bawk. Hei bakah hian Marvel movie - Captain America; Brave New World, Thunderbolts, Blade leh Fantastic Four-te pawh July 2024, December 2024, February 2025, leh May 2025-ah tihchhuah an ni bawk ang.

Star Wars fan-te chuan movie chhunzawmna pahnih en turin December, 2025 leh December, 2026-te an nghah thlen leh phawt a ngai dawn. Star Wars movie tihchhuah hnuhnung ber, Star Wars: The Rise of Skywalker kha kum 2019-ah a chhuak a ni.