Tribal Power-in Music Video thar an tichhuak dawn

Mizor rock legend Tribal Power chuan zanin hian music video thar 'Speed 30000' an tlangzarh dawn a, Tribal Power rimawi ngainatute tan chuan a ngaihven chi hle ang.

Tribal Power hian an music video thar an tlangzarh rual hian an official YouTube channel an tlangzarh nghal dawn bawk a, music video leh YouTube channel tlangzarh programme hi LPS 1-ah zanin dar 8-ah hian live-in a thlir theih dawn a ni.  

Vocalist Opa chiah original member a awm tawh a, Mizo guitarist ṭha sawi zinga a hming sawi hmaih ngai loh, Maitawka leh an bassist Remsangpuia te an boral tawh a, an keyboardist Maduhawma'n remchan lohna a neih vangin a telpui tawh rih lo a, drummer Truman Australia lamah eizawnna avanga a awm bawk avangin tunhma deuha kan hriat ṭhin ang kha kan hmu thei dawn lo tih erawh Tribal Power ngainatute'n lo hre lawk ila.

Chutiang chu ni mah se band line-up ṭha tak kan hmu dawn tho a, vocalist chu kan hriat lar sa leh an band khaipa ber Opa bawk a la ni a, Opa zai hun rei tak hnuah kan ngaithla leh thei tur hi a lawmawm hle. Tuna an line-up tur chu, guitarst Vla, bassist Sanglura, drummer Sangkima leh keyboardist Tepuia te an ni dawn. Tin. Drop Doubt guitarist Ztpa Rokhum chuan a pui ṭhin bawk a ni.

Tribal Power hi kum 1995-a indin kha niin NE Beat Contest 96 winner-te pawh lo ni zak zak tawh an ni a, an hla ṭhenkhat 'Dolma', 'I Belh Pawn', 'Aizawla Mi Ngei' leh 'Lianchhiari'-te phei chu Zoram rimawi khawvelah a dai leh tawh ngai dawn lo a ni, ti ila kan sawi sual awm lo e. Zanina an tlangzarh tur 'Speed 30000' hmang hian tunhmaa Tribal Power kan hriat ṭhinin Mizo rilrem zawng tak rimawi min ngaihthlak tir ṭhin ang kha min ngaihthlak tir leh dawn em tih chu hriat a chakawm tawh hle a ni.