Dampui Forest cover photo tichhuak

Mizo film danglam tak tur, 'Dampui Forest' chu shooting zawh fel a ni tawh a, editing an khawih mek a, kan en thei thuai dawn e. Film cover photo pawh tihchhuah a ni tawh.

Dampui Forest hi Mizo film lama kan la hmuh zen zen loh, adventure horror lam hawi tur a ni. Sports Department-in Adventure Sports tih theihna hmun tur leh nature tourism tih hmasawnna lam hawi hmun(place) zawng tura adventure team a tirhte thil tawn kan hmu chho dawn. Ngentiang khuaah an chang a ni.

Mizo tlangval chhuanawm leh huaisen, adventure leh bushcraft lam min hmuhtir ṭhintu Zira PC, comedian ṭha leh parody music video nalh tak tak siam ṭhin ELZA TV, Comedian Search finalist, Pachuau Lalenkawla, Mizo Girls Group Zonet buatsaiha finalist, Lalnunhlui te bakah hmeichhe solo camper, Love of adventure YouTube channel neitu Apuii Bualte te kan hmu dawn. Main role play-tu ber Emily pawh hi College kal laia College Miss pawh lo ni tawh a ni a, Kenny Lianhna kan hmu dawn bawk. A changtute aṭang hian a hmuhnawm a rinawm nghal hle.

2017 film 'Detective Mart' director Lalruatfela chuan 'Dampui Forest' hi a direct a, Ṭhatea Video production chu director of photography a ni. Ruahman dan chuan June 20 hian trailer tichhuakin, July 28 ah film release tum a ni. Runmawi Apps-ah en theihin a awm ang.