Science & Environment: NASA-in vanthengrengah pangpar an ti par!

National Aeronautics and Space Administration (NASA) in vanthengrenga pangpar an chin chu rawn par chhuakin, he pangpar thlalak hi Nilaini khan social media lamah an rawn dah chhuak.

NASA hian vanthengrenga pangpar leh thlai chin theih dan tur hi kum 1970 chho aṭang khan scientist-te'n an zir ṭan tawh tih sawiin, kum 2015 khan NASA astronaut Kjell Lindgren chuan International Space Station(ISS)-a thlai chinna, Veggie Production System kalpuina hnuaiah 'Zinnia' pangpar hi chingin a enchhin tih an tarlang. Zinnia par parh lai tak thlalak an rawn dah chhuahah hian, a hnung lamah khawvel pawh a rawn lang ve ruai ruai a ni.

ISS-ah hian Veggie unit hi pahnih awmin, astronaut-te chuan thlai dang pawh an ching chhin mek a, heng zingah hian lettuce, tomato leh hmarcha pawh an tel. A dang pawh chin belh zel an tum.

Vanthengrenga thlai chin dan experiment an kalpui mek chu a pawimawh thu sawiin, NASA chuan "Kan huan siamte hi intihtheihna leh pho lan mai tur ringawt ni loin, orbit-a thlai awm dan aṭang hian khawvel pawn lama a chin theih dan chiang zawkin kan hriatthiam phah thei dawn a ni. Thla, Sikeisen leh a piah lama long-term misison neite tan ei tur tharlam an neih theih dan turte kan hre thei dawn a ni," a ti.