India Cycles4Change intihsiakah Aizâwl hming ziak lut

India Cycles4Change intihsiaknaa tel tur India khawpui hrang hrang 95 zingah Aizawl khawpui pawh ziahluh a ni.

He intihsiakna hi Smart Cities Mission kaltlanga sorkar laipuia Ministry of Housing and Urban Affairs buatsaih a ni a, Smart Cities Mission chuan India Programme of the Institute for Transportation and Development Policy (ITDP) nen ṭangkawpin he intihsiakna hi ruahmanin an buaipui a; cycle hman uar leh cycling himna khawpui siam chu an tum ber a ni tih an tarlang.

Intihsiakna buatsaihtute chuan Aizawl mipuite pawhin ṭha taka an ṭawiawm an beisei thu thuchhuah an siamah chuan an tarlang bawk. India Cycles4Change Challenge hi June 25 khan Smart City Mission kum nga tlin lawmnaah Minister of State (Independent Charge), MoHUA Hardeep Singh Puri chuan a tlangzarh a, intihsiakna hian khawpuite chu cho phurin, mipuiteah cycling uar sauh tur leh Covid 19 hnu lam atâna mipuite'n him taka cycle an khalh theih dân tur ruahmanna siam chhuak turin a phut.

Intihsiakna hi thawh hniha neih tur a ni a, thawh khatna chuan October, 2020 thleng a huam ang a, cycling lane, mipuite nen a inkawmkhawmna te, survey leh cycling uar tura campaign siamte a tel ang. Heng hmalaknate hi endik a nih hnuah a tiṭha zual khawpui 11 thlan chhuahte chuan intihsiak thawh hnihna an hmachhawn leh dawn a, hei hian nakkum May thleng a awh thung 

dawn a ni.

Khawpui tiṭha 11 thlan chhuahte hian Rs Vbc 1 ṭheuh an dawng dawn a, mi thiamte kaihhruaina hnuaiah hma an lak chhunzawm ang. Mipuite ṭawiawmna chu he intihsiakna atâna teh fung pawimawh tak a ni a, khawpuite ṭanpui nan intihsiakna buaipuitu ten online portal  "Support Your City" siam a ni bawk a; he portal kaltlanga survey siamte chu dah khat turin intihsiakna buatsaihtute chuan mipui an sawm a ni.