Netflix-in Squid Game 2 changtu turte puang

Netflix chuan mi tam tak nghahhlelh, Korean web series Squid Game season 2 siam a nih tur thu a sawi hnuah, nimin khan season thara changtu turte a rawn puang.

Squid Game Season 2-ah hmel thar kan hmu nual dawn a, chung zingah chuan Im Si-wan, Kang Ha-neul, Park Sung-hoon, leh Yang Dong Geun-te an tel. Anni hian season 1-a changtu Lee Jung-jae, Lee Byung-Hun, Wi Ha-jun, leh Gong Yoo-te an rawn zawm ang.

Report chuan July thlaah Squid Game Season 2 hi chan ṭan a ni dawn niin a tarlang. Season tharah hian contestant 456-te'n lawmman, USD mtd 4.56 inchuhin intihsiakna hautak tak an hmachhawn leh ang. Season hmasaa intihsiakna ang kha chu a ni dawn lo a, mahse, a hautak leh dawn hle tih erawh chu a chiang sa. Netflix chuan Squid Game: The Challenge hi kumin November thlaah premier a ni dawn tih a lo sawi chiang tawh bawk.

Squid Game season hmasa kha Hwang Dong-hyuk ziah leh direct a ni a, kum 2021 November thlaah Netflix-ah tihchhuah a ni. Rin phak bakin a hlawhtling a, he series hi non-English languge show zingah Emmy Awards-a Best Drama-a nominate hmasa ber a ni. Award hi dawng chiah lo mah se, Lee Jung-Jae chu Drama Series-a Asian actor zinga Emmy for Outstanding Lead Actor dawng thei hmasa ber a nih phah a, director Hwang Dong-hyuk pawhin Emmy for Outstanding Directing for a Drama Series a dawng bawk a ni.