Lailapur-Tuipang inkara bawlhhlawh ûm chhar faitu LZ-a'n Siaha a thleng

Faina lama mipuite zirtirna ni paha Lailapur, Assam aṭanga Tuipang thleng kea kal tum, Vanlallawmzuala Varte (LZa) s/o VL Chhuanawma, Mission Veng chuan June 17, Inrinni khan Siaha a thleng a, vawiin hian Tuipang a thlen theih beisei a ni.

LZa hian May 26, 2023 khan a 'mission' hi ṭanin Lailapur a chhuahsan. Bawlhhlawh dah khawmna turin an lirthei, pick-up truck-in a zui zel a, pick-up khalhtu H. Lalhruaizela, Sairangin a ṭul angin a pui ṭhin.

Kawngpui dunga plastic bawlhhlawh, a bikin ûm (bottle) an hmuh apiang chharin, lirtheiah an dah zel a, khua an paltlangnaa bawlhhlawh paihna hmun bik nei khuaa an bawlhhlawh paihnaah an paih ṭhin. LZa chuan, ni tin an kal char char lo a, Aizawlah zan thum an chàm thu leh Lungleiah an lirthei siam ṭhat a ngaih avangin zan li an riah thu a sawi.

Vawiin hian an tàwpna tur Tuipang an pan ang a, ban hman an tum. Lailapur aṭanga an chhuah hnuah Siaha telin khaw 14-ah an riak tawh.

Bawlhhlawh an chharte chu khaw 15-ah dumping ground-ah an paih tih sawiin, LZa chuan, "Lungleiah chuan UDPA department hotute'n an motor-in min lo laksak," a ti a, Siahaah pawh sorkar hotute'n an lo laksak thu a sawi.

Vanlallawmzuala Varte hian Tuipang a thleng thei a nih chuan km. 630 vel a kal dawn a; a 'mission' a puitlin theih nan hian Mizoram State Sports Council, UDPA hnuaia Swacch Bharat Mission (Urban), National Health Mission, bialtu MLA Lalchhuanthanga, Kim Tea, CLS Academy leh Dr. Lalchhuanawma te'n an buaipui a ni.