Spotify-in Meghan Markle podcast titawp

Streaming giant, Spotify chuan Duchess of Sussex, Meghan Markle podcast chu a tichhuak chhunzawm tawh dawn lo.

Spotify leh Harry leh Meghan content creation label, Archewell Audio chuan Meghan podcast, Archetypes chu series khat tihchhuah a nih hnuah chhunzawm a ni tawh dawn lo tih thuchhuah siamin an tarlang.

Archetypes hi August 2022 aṭangin tihchhuah a ni a, episode 12 a awm. Spotify hian kum 2020 kumtawp lam khan USD mtd 25-in contract a ziahpui. Inremna an siam thu an puan tirh hian series eng emaw zat kalpui tura ngaih a ni a, mahse, series khat chiah tihchhuah a nih hnuah an titawp leh ta mai a ni.

Hetih lai hian American media-te chuan he podcast hian an beisei a pha lo hle a, hei vang hian contract an ziahpuina zat pawh a vaiin an pe dawn lo niin an tarlang.

Britain lal chhungkaw lak aṭanga an inlak hran hnuah, Harry-te nupa hian sum lakluhna tur kawng pawh an dap viau a, Netflix nena contract an ziah bakah, Harry hian Penguin Books chu contract lian tham tak a ziahpui a, a autobiography Spare pawh an tichhuak tawh a ni.