Ṭhazual Lengzema pakhatna Zodini ft. Vanzara 'Chung Khuanu kutchhuak'

Khiangte Construction Ṭhazual Lengzem chart thar berah, Zodini ft. Vanzara 'Chung Khuanu kutchhuak' chu pakhatna a ni.

'Chung Khuanu kutchhuak' hi chart hmasaah khan pahnihna a ni a, hma rawn sawn zelin a chung ber dinhmun a ruah luah thei ta a ni. He hla hi Vanzara phuah niin music leh recording hi Tluanga Hnamte kutchhuak a ni a. Music video hi Anthony Wowv siam a ni a, May 13-a an tihchhuah a ni. A hla a mawi a, ngaihthlak a nuamin video pawh a hmuhnawm. Ngaihthlak a la hlawh chho zel ngei ang.

Chart tharah hian Mizo Idol season 7-a mipuite lawm hlawh tak, Vanlalduhawma 'Kawrthindeng' chu pahnihnaah a rawn chho a, ani pawh hi pahnihnaah chuan a tawp mai a dawnin a lang lo a, hma a la sawn zel a rinawm e.

The Radio 'I kiangah chauh' tih pawh chart hmasaa pasarihna aṭanga rawn invawrh chhoin, pathumnaah a rawn lang ta. Anni bakah top 5-ah Bektei 'Engtinge I theih zawk' leh Lalṭhakima (Akima) 'Tuihna thar' te an awm bawk.

Hmel thar 4 an rawn lang e

Ṭhazual Lengzem chart-ah hian hmel thar pali an rawn lang ṭhawt a, chungte chu Folina Chongthu 'Hmeltha, I tan', Nancy Zothanmawii 'Hmana kan nunhlui', Mawimawia 'Suangtuahna' leh Francis Kawlni 'Rinawmin' tihte a ni. Mi thar rawn langte hi pasarihna aṭanga sawmnaah an intlar thla a, hetih lai hian chart hmasa lama 10-na Kimdongi X Ez Kid 'I tling si' chu paruknaah a rawn chho ve leh bawk a ni.