US Box Office : No. 1-ah beisei pha lo 'The Flash'

The Flash' chu tlangzarh a nih kar tawpah US Box Office-ah No. 1 rawn ni mah se, a sum lak luh lamah beisei erawh a pha lo hle.

Analyst-te chuan Ezra Miller channa, superhero adventure hi tihchhuah a nih aṭanga ni thum chhungin USD mtd 70 aia tlem lo la lut tura an chhut laiin, USD 55.1 chauh a la lut thei.

Ram pawn lamah pawh beisei a pha chuang lo. Market 79 aṭangin USD mtd 72 a la lut a, heng zinga USD mtd 38 hi China aṭanga lut a ni. Pathianni thleng khan khawvel pumah USD mtd 130 a la lut.

Tlangzarh a nih hmain, a changtu ber Ezra Miller hian thubuai hrang hrang a neih avangin 'The Flash' hian a ṭha lo zawngin chanchinthar a luah nasa hman hle, Miller hian nikum August thla khan 'mental health issue' vangin treatment a lak thu pawh a puang zui a ni. Hun eng emaw chen vantlang hmuha a inlan loh hnuin, June 12-a Hollywood-a film premier a nih khan a rawn lang ve leh chauh a ni.

Opening weekend-ah beisei pha lo mah se, DC studio co-chief James Gunna chuan a la chet ṭhat chhoh zel a ring tlat tih sawiin, "Superhero movie siam tawh zinga a ṭha ber zinga mi" tiin a sawi. Critics lam pawh an ngaihdan a in ang lo hlawm viau a, heti chung hian Rotten Tomatoes-ah 67% "fresh" review a hmu pha tho.

No.2-ah pawh film thar

No. 2-ah pawh film thar, Disney animation 'Elemental' a rawng lang a, hei pawh hi Pixar film tihchhuah tawh zinga opening week-a sum la lut tlem ber dawttu a ni. 'Elemental' hian USD mtd 29.5 chauh a la lut a, kum 1995-a Pixar theatrical tihchhuah hmasa ber, USD mtd 29.1 la lut thei 'Toy Story' sum lak luh a pel hret thei chauh a ni.

Spider Man thawm a la na zel

Spider Man : Across the Spider-Verse chu No. 3-ah tla thla mah se, audience a la hip khawm ṭha zel a, June 2-a tihchhuah tawh hian a kar thumnaah pawh US-ah USD mtd 27.8 a la la lut thei. Khawvel pum huapa a sum lak luh hi USD mtd 489.3 a tling tawh.