Glastonbury Festival-ah Renewable energy chauh hmang dawn

Vawiin aṭanga ṭan tur, khawvela greenfield music and performing arts festival lian bera nia sawi, ni nga awh, Glastonbury Festival-ah, a ṭum khatna atan renewable energy vek an hmang dawn.

Worthy Farm, Somerset, England-a festival neihna tura electricity mamawh chu solar PV leh battery hybrid system hmang veka pek a ni dawn tih sawiin, market stall tan temporary wind turbine siam a ni a, generator zawng zawngah pawh cooking oil hmanga siam, sustainable, renewable palm oil-free HVO fuel hman a ni ang. Farm leh Festival office-ah pawh solar energy vek hman a ni ang.

Kum 2019 khan he festival-ah single-use plastic khap a lo ni tawh a, kuminah hian fan-te chu disposable vapes keng lo tura hriattir an ni bawk. Festival neihna hmunah hian recycling facility a awm nghal bawk a ni.

June 21-25 chhunga neih tur, Glastonbury Festival line-up ah hian Arctic Monkeys, Guns N’ Roses, Elton John, LIL NAS X, Lana Del Ray, Rick Astley, Chemical Brothers, Queens of the Stone Age, Royal Blood, Texas, Skepta, Caroline Polachek leh Digga D te an tel. Glastonbury favourite Fatboy Slim pawh a inlan dawn.