‘Adipurush’ film writer-in police venhimna dil

Prabhas, Kriti Sanon leh Saif Ali Khan-te channa, June 16-a tlangzarh 'Adipurush' chuan mipui beisei a pha lo hle a, VFX ṭha tawk lo leh 'dialogue' chungchang chu social media lamah sawiselna a tam hle.

A bikin film writer Manoj Muntashrir Shukla chuan beih a tawk nasa a, Mumbai Police-te hnenah venhimna pe turin a dil a, police-te'n an veng zui. 'Lanka Dahan' sequence-a Lord Hanuman ṭawngkam hmanah mi tam tak an lungawi loh avangin, Shukla hian a nunna atana hlauhthawnawm khawpin vau a tawk a ni.

Shukla chuan mi tam tak sawisel lai dialogue chu an siam ṭhat tur thu a sawi. "Producer-director nen in rilru ti natu dialogue hi ennawna siam ṭhat kan rel a, tun karah film-ah hian kan belh leh dawn a ni," tiin a Twitter-ah a tarlang.