Chelsea player paliin Saudi Arabia lam an hawi

N'Golo Kante, Edouard Mendy, Kalidou Koulibaly, Hakim Ziyech

Player ṭha tak, kum tam pawh la ni si lo Chelsea player pali - N'Golo Kante, Edouard Mendy, Kalidou Koulibaly leh Hakim Ziyech te chuan sum tamna Saudi Arabia lam an hawi a, an vai hian an kal ngei dawn ni pawhin a lang ta.

Blues striker Romelu Lukaku pawhin Saudi Arabian club aṭangin sawmna duhawm tak a dawng. Mahse, Belgium international striker hian European football khelh chhunzawm a la thlang zawk niin an sawi.

Pierre Aubameyang pawh Saudi Arabian club nen an inbe ngei tih hriat a ni a, mahse a club hming chiang taka tarlan a ni rih lo thung - nipui bazar laiin Chelsea hi nasa takin an insingsa ngei dawn tih chu a chiang.

N'Golo Kante

Midfielder ṭha, khawi hmunah pawh a lo awm hman zel emaw tih mai tur N'Golo Kante hian nakkum June thla thleng daih Chelsea tan contract a nei mek - Blues lamin contract chungchang sawi pui mah se an inrem lo.

Kum 32 mi Kante hian hliam vangin season hmasa kha a khel mumal lo tluk a ni a, a vanglai a pel chho ve dawn ta niin a lang. Season sarih a hman tawhna Stamford Bridge chhuahsanin Al Ittihad a zawm ang.

Italian journalist Fabrizo Romano-a'n a tarlan dan chuan Kante hian kum li daih contract a ziak fel tawh a, kum li chhung hian euro maktaduai 100 a hlawh ang - Al Ittihad chuan an player a nih thu an puan thuai a rinawm.

Edouard Mendy

Chelsea tana Champions League nomawi chawi tawh Edouard Mendy hian season hmasa a hmang ṭha lo, hliam vanga a chawlh bakah a dam pawhin a aiah Kepa Arrizabalaga an thlang zawk - World Cup hnuah khan Blues tan match li chiah a khel.

Kum 31 mi Mendy hian Al Ahli a zawm dawn niin sawi a ni; Saudi Arabian club nen hian kum 2026 thleng inremna an nei tawh niin an sawi a, loan hmang ni loin a nghetin a chhuak ang.

Senegal international hian Chelsea tan kum 2025 thleng daih contract a nei mek, mahse coach thar Mauricio Pochettino chuan si ban nghak turin Kepa a ring zawk niin an sawi a, hei vang hian Mendy tan sum tamna leh inkhelh tam theihna pan hi thil mak a ni dawn lo.

Kalidou Koulibaly

Napoli aṭanga Chelsea-in Kalidou Koulibaly an lakluhna kha a la rei lo, season hmasa mai kha a la ni. Senegalese defender lakah Blues ṭantuten beisei an nei sang a, mahse an beisei ang tak chhanna erawh an hmu lo niin a lang.

Inter Milan chuan Koulibaly hi an ngaihven a, mahse Italian club hian loan hmang chauha lak an duh - Chelsea lamin a ngheta hralhna an ngaihtuah thung. Al Hilal nen thui tak an inbe tawh, kum 26 thleng atan inremna an nei tawh niin an sawi bawk.

Koulibaly hi kum 32 mi a ni a, defender atan chuan a la upa hran lo. Mahse, tuna a lan dan chuan coach thar Pochettino-a'n team a din tum danah tlarhnung lam siksawk a tum tih a lang, hmel thar kan hmu ngeiin a rinawm.

Hakim Ziyech

Al Nassr hi khawvel club lar pawl a ni der tawh - a chhan chu Cristiano Ronaldo an neih vang a ni. Tunah chuan Al Nassr hian Chelsea aṭanga Hakim Ziyech lakluh tumin hma an la mek a, mimal thilah chuan harsatna a awm a rinawm loh.

Ziyech hian London club-ah hian buaina a lo nei tawh ṭhin a, kumin January thla pawh khan Paris Saint Germain lamah chhuah a lo tum tawh - mahse thua an ziah fel hma chiah loh avangin a cham chhunzawm ta zawk a ni.

Ronaldo neitu Al Nassr hian Ziyech bakah Atletico Madrid aṭangin Saul Níguez lak tumin hma an la mek, anni pathum hi tlarhma lamah an dintlar tir thei a nih chuan European club ṭhate tan pawha hmachhawn châkawm lo tak an ni thei ang.

Romelu Lukaku

Duh taka an lahluh kha an hralh a, chumi hnuah duh takin an lalut leh a, tunah chuan hralhna tur an zawng leh ta - Romelu Lukaku leh Chelsea te hi chu kawprem tura duan an ni ngang lo a ni.

Belgium international hian season hmasa khan Inter Milan tan loan hmangin a khel a, Italian club hian loan bawka hawh nawn an pawi ti lo. Mahse, khawthlang chanchinbuten an tarlan dan chuan Blues hian a ngheta chhuahtirna an zawng.

Kum 30 mi Lukaku hian European football khelh zui a duh a nih chuan club thar a zawn a ngai dawn niin a lang, a hlawh a tamin a man a tam si - Chelsea tan chuan kaltirna mai tur zawn hmuh pawh thil awlsam a ni lo mai thei.