Taylor Swift-in international tour neih hun tur puang

US-a record-breaking Eras tour nei mek, Taylor Swift chuan international tour a neih hun tur a puang a, kum tharah UK, Europe leh Asia-ah show a chhunzawm dawn.

US-a tour a neiha record siam chho mektu, Swift chuan Europe tour hi nakkum May 9-ah Paris aṭangin a ṭan dawn a, Stockholm, Madrid, Lisbon leh Lyon-ahte concert hi a nei ang. June 7-ah UK leg ṭanin Edinburg, Liverpool, Cardiff leh London-a Wembley Stadium-ah show a ni ang. Hemi hnu hian Dublin, Amsterdam, Zurich, Milan, Gelsenkirchen, Hamburg, Munich, Warsaw leh Vienna-ah tour nei lehin, Wembley Stadium-ah August 16 leh 17-ah a kharna a nei ang.

Europe tour ṭan hmain Asia lamah a kal hmasa dawn a, mahse, Asia tour hi Japan leh Singapore-ah chauh a nei ang. Singapore-ah hian show vawi thum neiin March 2-4 chhungin Singapore National Stadium-ah a perform dawn. Tokyo Dome-ah February 7-10 chhung show a nei dawn bawk a ni.

Eras Tour hi kum 2018 hnua Swift world tour hmasa ber a ni a, March 17 khan Glendale, Arizona-ah a ṭan. US tour a neih mekah hian ticket hralh tam lamah record a siam a, nikhatah ticket mtd 2.4 hralh a ni. Ticket buaipuitu Ticketmaster pawhin an buai phah a, fan-te'n company hi an khing hial a ni. Billboard chuan US tour aṭang hian USD mtd 591 vel la lut turin a chhut.