Dr Dre hnenah Hip-Hop Icon Award hmasa ber hlan

ASCAP Rhythm & Soul Music Awards-ah Dr Dre chu Hip-Hop Icon Award hmasa ber hlan a ni.

Los Angeles-ah an ram huna Ningani zan khan 2023 ASCAP Rhythm & Soul Music Awards hi semin, hip-hop genre kum 50 tlin an lawm nghal bawk.

Kum 59 mi, music and tech mogul Dr Dre hi hip-hop genre lamah a thawh hlawk avang leh hnuhma ropui tak a hnutchhiah avangin chawimawina hi hlan a ni.

American Society of Composers, Authors and Publishers (ASCAP) board chairman, Paul Williams chuan Dr Dre hi Hip-Hop culture thlaktu a ni tiin, music industry-ah mi pawimawh tak a la ni chhunzawm zel a, a hnathawh ropui tak avangin ASCAP Hip-Hop Icon Award hi hlan a ni tiin rapper hi a fak hle.

Kum 2010 khan Dr Dre hian ASCAP Founders Award a dawng tawh a, kumin February thlaa 65th Annual Grammy-ah khan black music chawi kanna lama a thawh hlawk avangin Dr Dre Global Impact Award hlan a lo ni tawh bawk.

Dre, a hming tak Andre Romelle Young hi modern hip-hop lama sulsutu pawimawh ber nia sawi a ni ṭhin a, kum 40 dawn liam ta khan World Class Wreckin’ Crue member angin a rawn lar chhuak ṭan a ni. Hemi hnu hian Easy-E, Ice Cube leh midangte nen gangsta rap group, N.W.A an din a, Hip-hop lama artist ropui tak tak rawn thehchhuaktu, Death Row Records dintu leh neitu zingah a tel bawk. N.W.A hi kum 2016 khan Rock & Roll Hall of Fame-ah lak luh a ni.

Dr Dre hian kum 1992-ah a solo album hmasa ber, The Chronic a tichhuak a, tun thlengin hip-hop album ṭha ber zinga sawi a la ni. Studio album hi pathum neiin, a dangte chu 2001 leh Compton a ni a, album hi mtd 20 chuang a hralh.

Hip-hop sub-genre West Coast G-funk rawn tichhuaktua sawi a nih bakah, Dre hian Beats Electronics hnuaia music tech variety hmasawnna kawngah pawh a thawh hlawk hle. He brand hi Interscope Records dintu, Jimmy Lovine nen thawk duna an siam a ni. Kum 2014-ah streaming service, Beats Audio-ah let chhoin, a hnuah Apple chuan USD tld 3 in a laksak a, Dre chu hip-hop artist billionaire ni thei hmasa ber a nih phah a ni.