YouTube-ah AI-powered Dubbing tool hman theih dawn

Video streaming site lar ber zinga mi, YouTube chuan content creator-te tana thil awlsam leh ṭangkai tur, Artificial Intelligence (AI) hmanga an video siamte ṭawng hrang hranga tihchhuah theih dan tur a duang mek.

Company chuan Ningani khan fan, creator, executive leh online brand-te annual convention, VidCon-ah hemi chungchang hi puangin, Artificial Intelligence (AI) powered dubbing tool chu hman theih tura an ruahman mek thu a sawi.

YouTube-a Creator Products vice president, Amjad Hanif chuan creator ṭhenkhatah he 'dubbing tool' hi en chhin a nih tawh thu sawiin, ṭawng (language) hman theih an dah pawh hi dah belh zel an la tum tih a sawi a ni. Tunah rih chuan AI-powered dubbing service, 'Aloud' ah hian ṭawng chi pathum; English, Spanish leh Portuguese chauh a la hman theih.

Hanif chuan audio track-te hi ṭawng danga leh bakah, creator aw (voice) ang thei ang bera siam tum a ni, a ti.

Aloud website chuan dubbing tool hian video-a thusawite chu lo ziak chhuakin, hei hi video creator-te chuan ennawnin an edit thei ang a, hemi hnuah ṭawng dangah letin a in 'dub' tawh dawn a ni, a ti. Hemi rual hian an ruahmanna thar hman theih hun tur tak erawh an la sawi chiang lo a, kum thar lamah a function theih rin a ni.