Vanglaini Bihchianna - Entrepreneur huang : Khiangte skincare

Mizo ṭhalaite zingah mahni kutkawiha eizawng kan pung chho zel a, kan eizawnna huang pawh a zau chho ve zel. Khiangte skincare hian hmai leh vun enkawlna lam ṭha tak siamin, sunscreen bakah serum hrang hrangte a siam chhuak a ni.

Bul ṭan dan:
Khiangte skincare neitu K. Lalrammawii (Mimi), Champhai Vengthlang chuan a bul ṭan danVanglaini a hrilh a, "Kum 2019 khan phai lamah ka chhang chiah damlo, ICU-a awm hun eng emaw chen ka awmpui laiin, tihtur vak a awm loh avangin Instagram lam ka en nasa a, handmade soap an siam mawi deuh ka hmu a, Youtube-ah tutorial enin ka atchilh zui a ni. Mizoram kan haw hnuah, Champhai ka thlen hmain Aizawlah ka pawisa neih ang angin a siamna hmanrua chahin ka siam ve nghal a," tiin sahbawn a siam hmasak thu leh, WhatsApp-a Zonun Work Wear-ah zuarin a rin aia a hralh theih thu a sawi. Heta ṭang hian skincare lam market a ṭha tih hrethiamin a zir chho a, brand thar dinna turin manufacturer a zawng kual a, a duh ang a hmuh veleh a chhungte rawnin, rem an tihsak hnuah an pawisa pukin kum 2020 Covid lai khan Khiangte Skincare hi a din ta a ni.

An thil tum:
Khiangte skincare hian a tum ber chu skincare ṭha, man tlawm zawka mipuite'n an lei theih tura siam chhuah a ni.

Thawktu:
Mimi hian a tirah chuan amah vekin a buaipui a, "Pathian leh min duhsaktute zarah Khiangte skincare-in mi hriat a hlawh chhoh tak zelah mahnia tih theih a ni ta lo," tiin tunah hian amah pui turin mi pathum a chhawr mek tih a sawi. Pahnih chu online-in an thawk a, pakhat chuan order fufillment lam a buaipui thung.

Thil siam leh zawrh chhuah dan:

Tunah hian serum chi li - Niacinamide serum, Hyaluronic Acid serum, Granactive Retinoid serum, Vitamin c serum bakah sunscreen an siam. Factory pahnih thawhpui mekin, "Kan manufacturer-te hnenah kan duh dan kan zu sawi a, an lo siam chhin chu a sample rawn thawnin kan duh loh laite kan sawi hnuah an lo siam ṭha leh ṭhin. A tam zawk hi cancel tawp a, a bula ṭan ṭhat lehte an ni. Kan duh tui vangin hun a duh deuh a, products pawh kan neih belh zung zung thei lo," tiin Mimi chuan Vanglaini a hrilh.

Dawr hran an siam loh avangin an thil siamte hi an website www.khiangteskincare.com leh Instagram page, Khiangteskincare aṭangin an zuar chhuak a ni.

An products zingah sunscreen hi an hralh chak ber a, serum zingah Hyaluronic Acid serum chu an hralh hnem ber a ni bawk.

Sum lakluh :
An sum lakluh dan hi thla tin a in ang lo a, mahse, eizawnna leh innghahna tlak a nih thu a sawi. Taihmak leh tumruh a ngaih thu sawiin, online business ni rih mah se dawr nghah ang deuha rilru pek loh chuan sales lamah a lang nghal zel a ni, a ti.

Hmachhawp :
Products neih belh zel an tum a, kumin kum tawp lamah product ṭha pakhat launch an tum. Products an ngah hunah customer-te tana awlsam zawk nan dawr neih pawh an la tum a ni.

Harsatna tawh:
Products thawn chhuah kawngah hasatna an tawk zeuh zeuh. State danga thawn chhuah ai mahin, Mizoram chhunga an thawnah a thangrei zawk fo. Customer-te'n an hmuh hma theihna atan sumo-a thawn ngaih changte a awm fo.

Mi tam takin Mizo brand an support viau laiin, ṭhenkhat chuan Mizo siam tih vanga iai phah an awm. "India-a siam chhuah ve ve ni si, hnam dang brand ring zawk tlat an la awm a ni"

Entrepreneurship:
"Entrepreneurship hi eizawn nan a tlak tawh hle. Tunlai mi phei chu social media,a bikin Instagram leh WhatsApp hian thil a ti awlsam a, kan hmuh phak lohte pawh kan customer ni thei vek an ni. Ṭhalaite'n hnathawh turah duhthlan tur kan ngah tawh a, kan teirei peih a, kan thawh taimak phawt chuan hralh theih loh tak tak a awm lo tih hi ka ngaihdan a ni," tiin Mimi chuan Vanglaini a hrilh. "Ṭhalaite hian sorkar hna ringawt beisei loin, entrepreneurship lamah kal suau ila. Sorkar khalh ngil tur pawhin mahnia kea ding kan tam hi a pawimawhin ka hria. Thianghlim taka hausak kan tum a nih chuan entrepreneurship tluka ṭha a awm lo. Hemi rual hian kan thawh mil zela 'reward' kan hmuh avangin ṭan mar hle a ngai thung," a ti.