TXT leh Jonas Brothers thawk dun dawn

American pop group Jonas Brothers leh Korean pop group TXT-te thawk dun chuan hla thar an tichhuak dawn ta.

Nick Jonas chuan Nilaini khan a Instagram-ah Korean group nena an thawh dun tur hi rawn tichiangin, an hla thar title tur pawh a rawn puang nghal a, Jonas Brothers leh TXT member-te selfie pawh a rawn dah lang bawk. TXT pawhin Jonas Brothers nena an thawh dun tur thu hi an official social media channel-ah sawiin, promotion poster pawh an dah nghal bawk. Band pahnih member-te hian TikTok video an siam chu an dah lang nghal bawk a ni.

An hla thar tur hi, 'Do It Like That' tih niin, July 7-ah an tichhuak dawn a ni. Ram hrang hranga fan nei ṭha pahnih an ni a, an fan-te pawhin an nghahhlelh thu an sawi zui nasa nghal hle.

K-pop band, Tomorrow X Together hi North America lamah an lar chak hle a, Gen Z lamah an tla na zual. K-pop band zingah American music festival, LOLLAPALOOZA a headline ni thei hmasa ber an ni.