2023 BMI Christian Awards sem a ni

Broadcast Music, Inc. chuan 2023 BMI Christian Awards chu kar liam ta khan Nashville-a company Music Row Office-ah a sem a, he hun hi sawm bikte tan buatsaih a ni.

Leslie Roberts leh Clay Bradley-te'n inkhawm hi an kaihruai a, hemi zana perform zingah The Voice contestant Brennley Brown chuan a hla thar 'Miracle Story' a rawn sa a, John Reddick chuan a hla hit 'God Turn It Around' a rawn sa bawk. Billboard Christian Airplay chart-a hmeichhe artist zinga debut-single-a record siamtu, Katy Nicole chuan a record siamna 'In Jesus Name (God of Possible) a rawn sa bawk a ni.

BMI Spotlight Award, Song of the Year, Songwriter of the Year leh Publisher of the Year award-te sem a nih bakah, BMI hian top 25 most-performed Christian song a puang nghal bawk.

2023 Song of the Year atan 'Jireh' thlan niin, he hla hi BMI songwriter - Chris Brown, Steven Furtick, Chandler Moore leh Naomi Raine-te siam a ni. He hla hi contemporary worship band - Elevation Worship leh Maverick Cit-te'n an sa a, Hot Gospel songs chart-ah no. 1 a nih bakah, Grammy Awards, Billboard Music Awards leh GMA Dove Awards-ah nomination eng emaw zat a hmu bawk a ni.

Songwriter of the Year chu Jeff Pardo hnenah hlan a ni a, ani hian kumina award-winning song panga - “Come What May,” “In Jesus Name (God of Possible),” “My Jesus,” “Yes He Can” leh “Gospel Song,”-te a phuah.

Capitol Christian Music Group Publishing chuan Publisher of the Year award a dawng. He company hian 25 most-performed songs of the year zinga hla 11 a tichhuak.

BMI Spotlight Award chu Christian music genre lama thawh hlawk, Dottie Leonard Miller hnenah hlan a ni bawk. Mille hi Daywind Music Groupb leh New Day Christian Distributors CEO/founder a ni. He chawimawina hi Randy Eldelman, Frank Gari leh Mike Post-te'n an lo dawng tawh a ni.